Dapi quest onn porscha il Forum per la bilinguitad, en collavuraziun cun ils chantuns partenaris Grischun e Tessin, TANDEMs linguistics.

Il program sa drizza a tut las collavuraturas ed ils collavuraturs dals dus chantuns che vulan meglierar lur cumpetenzas linguisticas oralas en tudestg, tudestg svizzer, talian u rumantsch. Il program na remplazza nagin curs da lingua, mabain porscha la pussaivladad da sa barattar a bucca e d'approfundar las atgnas enconuschientschas linguisticas ensemen cun ina persuna che lavura medemamain en ina administraziun chantunala.

La metoda

La metoda TANDEM linguistica sa basa sin la communicaziun orala ed il barat cultural. Ella porscha ina pussaivladad ideala d'exercitar in'ulteriura lingua uffiziala en in'atmosfera lucca, cun plaschair e creativitad.

Duas persunas cun differentas linguas maternas furman in TANDEM. L'emprim discurran ellas en ina lingua e suenter en l'autra. Uschia èn omaduas persunas dal TANDEM a medem temp persunas che instrueschan e che emprendan.

Ils TANDEMs linguistics vegnan furmads suenter l'occurrenza d'infurmaziun e da networking online. Las persunas interessadas survegnan suenter ina proposta per ina partenaria u in partenari da TANDEM.

Las partenarias ed ils partenaris da TANDEM s'inscuntran dudesch giadas durant sis mais. Ils inscunters duran mintgamai 60–90 minutas e han lieu, sche pussaivel, mintga duas emnas, en preschientscha u virtualmain cun in instrument da videoconferenza.

Las participantas ed ils participants organiseschan autonomamain lur dudesch inscunters da TANDEM. Tut tenor cunvegna e basegns persunals alterneschan els tranter conversaziun, lectura, gieus da rollas, exercizis da vocabulari ed ulteriuras activitads.

Infurmaziuns generalas

Premissas per la participaziun

• Lavurar per il chantun Grischun u il chantun Tessin
• Consentiment da la persuna superiura
• Enconuschientschas da basa da la lingua giavischada (nivel A1, meglier nivel A2)

Data e lieu da l'occurrenza d'infurmaziun TANDEM

TANDEM-Informationsanlass:

Mardi, ils 17 da november 2026, a las 14.00

Online via Microsoft Teams

Sche Vus na pudais betg participar a quest termin, essas dentant interessà u interessada vi d'in TANDEM linguistic, As annunziai tuttina cun il formular online. Suenter l'occurrenza As tramettain nus tut ils documents ed empruvain da proponer a Vus ina partenaria u in partenari da TANDEM.

Durada

Occurrenza d'infurmaziun: 45 minutas
TANDEM linguistic: 6 mais, 12 inscunters da mintgamai 60 minutas

Attestaziun
A la fin dal TANDEM survegnan las participantas ed ils participants, sin giavisch, in'attestaziun emessa dal Forum per la bilinguitad.

Ulteriuras infurmaziuns

Sche Vus avais dumondas u duvrais ulteriuras infurmaziuns, As drizzai per plaschair a:

Forum per la bilinguitad: tandem@zweisprachigkeit.ch

Chantun Grischun: Laura Candinas, sviluppadra dal persunal, laura.candinas@pa.gr.ch

Chantun Tessin: Daniela Stampanoni, collavuratura scientifica, daniela.stampanoni@ti.ch